Posted on: October 8th, 2022
Na Byarugaba Innocent,Pwani
Katibu wa Itikadi na uenezi wa Chama cha Mapinduzi -Taifa Comred Shaka Hamdu Shaka,Leo Jumapili Oktoba 9 amefika kujionea maonyesho ya Uwekezaji na Biashara yanayoendelea kwenye Viwanja vya Stendi ya Zamani Kibaha Mkoani Pwani
Maonyesho haya yamezinduliwa Oktoba 5,2022 na Rais wa awamu ya nne wa Jamhuri ya Muungano wa Tanzania Mhe.Dkt .Jakaya Mrisho Kikwete yakiwa na kauli mbiu isemayo;Pwani ni sehemu sahihi kwa uwekezaji,pamoja tujenge Viwanda kwa uchumi na ajira endelevu huku ikishirikisha kampuni,Mashirika na taasisi mbalimbali.
Shaka aliyepokelewa na Mkuu wa Wilaya ya Kibaha Mhe.Sara Msafiri na kuongozwa kutembelea Mabanda ya washiriki ameridhishwa na Maonyesho haya kwani yameandaliwa muda muafaka kuchagiza uwekezaji hasa wa Viwanda nchini.
Aidha,Shaka amempongeza Mkuu wa Mkoa wa Pwani Mhe.Abubakary Kunenge kwa kufanikisha maonyesho haya
Akiwa katika Banda la Wizara ya Ardhi nyumba na Maendeleo ya Makazi amezipongeza Halmashauri zote tisa za Mkoa wa Pwani kwa kushirikiana na Wizara kuwa na Mpango kabambe wa kupanga,kupima na kutenga maeneo maalum ya uwekezaji wa Viwanda
Hali kadhalika,Comred Shaka Hamdu Shaka ameridhishwa na kiwanda Kipya cha Azam kinachozalisha Sukari ya Bagamoyo na kwamba kimepanua wigo wa upatikanaji wa mahitaji ya Sukari,kutoa ajira kwa wananchi hasa Vijana na kuongeza Mapato ya Serikali kwani watalipa kodi
Aidha,ametoa rai kwa wananchi kuhudhuria na Maonyesho hayo ili kupata teknolojia mpya ya kuandaa bidhaa tofauti zinazoendana na mahitaji ya Dunia ya leo
Maonyesho haya ya Viwanda Mkoa wa Pwani yanafanyika kwa mara ya tatu yatafikia tamati siku ya Jumatatu Oktoba 10,2022
