Posted on: September 8th, 2025
HALMASHAURI YA MANISPAA YA KIBAHA YAFANYA KIKAO CHA TATHMINI YA UTEKELEZAJI WA MKATABA WA LISHE KWA ROBO YA APRILI - JUNI 2024/2025
Halmashauri ya Manispaa ya Kibaha imefanya kikao cha tathmini ya utekelezaji wa Mkataba wa Lishe kwa robo ya Aprili hadi Juni mwaka wa fedha 2024/2025, kikao kilicholenga kujadili hali ya lishe mashuleni na utekelezaji wa afua za lishe katika maeneo mbalimbali ya Halmashauri hiyo.
Kikao hicho kimefanyika chini ya uenyekiti wa Mkuu wa Wilaya ya Kibaha, Mhe. Nickson Simon, ambaye amewataka watendaji wa kata kuhakikisha wanasimamia ipasavyo utoaji wa chakula chenye lishe bora kwa wanafunzi katika shule zilizopo katika maeneo yao.
Aidha, aliwataka kufuatilia kwa karibu utekelezaji wa siku za lishe katika mitaa yao ili kuhakikisha jamii inapata elimu sahihi kuhusu umuhimu wa lishe bora.
Mhe. Simon amesisitiza kuwa watendaji hawapaswi kubaki ofisini bali wanatakiwa kwenda moja kwa moja mashuleni na kuhamasisha walimu, wazazi na jamii kwa ujumla kushiriki katika juhudi za kuboresha lishe kwa watoto.
Akitoa taarifa ya hali ya lishe mashuleni, Afisa Lishe wa Manispaa ya Kibaha Bw. Juma Nziajose ameeleza kuwa shule zote katika Halmashauri hiyo kwa sasa zinapata chakula cha kutosha na wanafunzi wanakula mlo wenye lishe bora, hali inayochangia kuongeza mahudhurio darasani pamoja na kuongeza bidii ya wanafunzi katika kujifunza.
Bw. Nziajose amebainisha kuwa hali hii ni matokeo ya ushirikiano mzuri kati ya Halmashauri, jamii na wadau wa maendeleo katika kuimarisha afua za lishe mashuleni.
Halmashauri ya Manispaa ya Kibaha inaendelea kuchukua hatua mbalimbali kuhakikisha kuwa suala la lishe linapewa kipaumbele katika mipango ya maendeleo, hususan kwa watoto wa shule ambao ni kundi muhimu katika ujenzi wa taifa la kesho.
