Posted on: November 14th, 2025
Mkurugenzi wa Manispaa ya Kibaha, Dkt. Rogers Shemwelekwa, amewataka wananchi wa Manispaa Kibaha kuendelea kufanya kazi kwa juhudi, maarifa na kujiletea maendeleo, ili kuinua uchumi wa kaya, Manispaa na Taifa kwa ujumla.
Dkt. Shemwelekwa ametoa wito huo katika Kata ya Tangini wakati wa ziara yake ya kikazi ya kutembelea na kukagua miradi ya maendeleo pamoja na kuzungumza na viongozi wa Kata na mitaa.
Amesema kuwa Serikali inayoongozwa na Mheshimiwa Rais Dkt. Samia Suluhu Hassan imehakikisha usalama wa wananchi wote nchini, hivyo hakuna sababu ya mtu yeyote kulegea katika shughuli za uzalishaji mali.
“Kwa Manispaa ya Kibaha ninawasihi na kuwahamasisha wananchi kufanya kazi kwa bidii, kwani nchi yetu ni salama na ina amani ya kutosha. Mhe. Rais Dkt. Samia Suluhu Hassan amehakikisha usalama upo, hivyo basi tuendelee kufanya kazi kwa juhudi na maarifa, tujiletee maendeleo, tulipe kodi, ili asilimia kumi zirudi kwenu na mapato ya ndani yaendelee kutekeleza miradi mbalimbali,” alisema Dkt. Shemwelekwa.
Aidha, amesisitiza umuhimu wa wananchi kushiriki kikamilifu katika shughuli za maendeleo katika maeneo yao, ikiwemo kuunga mkono juhudi za Serikali katika kuboresha huduma za kijamii kama elimu, afya, maji na miundombinu.
Kwa upande wao, wananchi wa Kata ya Tangini wamempongeza Mkurugenzi huyo kwa kutembelea miradi ya maendeleo na kushughulikia changamoto zinazowakabili.
“Sisi kama wananchi na viongozi wa mitaa tumefurahishwa na ziara hii ya Mkurugenzi wa Manispaa ya Kibaha, kwani ametatua kero nyingi za Kata yetu na kuonyesha uongozi unaosikiliza wananchi,” alisema mmoja wa wananchi wa Tangini
Ziara hiyo ni sehemu ya mpango wa ufuatiliaji wa utekelezaji wa miradi ya maendeleo unaolenga kuhakikisha matumizi sahihi ya fedha za umma na kuharakisha utoaji wa huduma bora kwa wananchi wa Manispaa ya Kibaha.
