Posted on: November 14th, 2022
Na Byarugaba Innocent,Kibaha
Mkurugenzi wa Halmashauri ya Mji Kibaha Mhandisi Mshamu Munde amewaongoza wataalam kutembelea Miradi inayoendelea kutekelezwa katika kipindi cha robo ya kwanza ya Mwaka wa fedha 2022/2023 Julai-Septemba ili kuchagiza kasi ya ukamilishaji kwa mujibu wa muda uliopangwa.
Mkuu wa Idara ya Mipango na Uratibu wa Halmashauri ya Kibaha Wambura Yamo amebainisha thamani ya miradi hiyo kuwa ni Bilioni 2.06 inayojumuisha ujenzi wa Wodi za Wagonjwa,jengo maalum la Upasuaji na jengo la kuhifadhia maiti kwenye hospitali ya Wilaya Lulanzi pamoja na vyumba vya Madarasa 38.
Wambura amewataka wasimamizi wa Miradi yote kuhakikisha inakwisha kwa wakati na kwamba huu si wakati wa kutoa visingizio kwani majengo hayo yanatakiwa kutumika kutolea huduma kwa wananchi.
Mapema wiki hii wakati wa Mkutano wa Baraza la Madiwani robo ya kwanza, Diwani wa Kata ya Picha ya Ndege Mhe.Karim Mtambo amehoji kutokamilika kwa wakati ujenzi unaoendelea kwenye hospitali ya Wilaya Lulanzi ambapo alielezwa kuwa fedha zipo na ujenzi utaendelea kwa Kasi baada ya taratibu za manunuzi kukamilika
Mkurugenzi wa Halmashauri ya Mji Kibaha Mhandisi Mshamu Munde ametoa rai kwa wakandarasi na wote wanaohusika na utekelezaji wa Miradi hiyo kuitekeleza kwa viwango vinavyoendana na thamani halisi ya fedha inayotumika na ikamilike kwa wakati ili ianze kutumika kutolea huduma
Kwa upande wake Mwenyekiti wa Halmashauri ya Mji Kibaha ameishukuru Serikali inayoongozwa na Mhe.Samia Suluhu Hassan Rais wa Jamhuri ya Muungano wa Tanzania kwa kuidhinisha fedha za ujenzi wa miundombinu hiyo muhimu kwa wananchi
