Posted on: November 13th, 2025
Mkurugenzi wa Manispaa ya Kibaha, Dkt. Rogers Shemwelekwa, amefanya ziara ya kikazi katika Soko la Mnarani Loliondo ikiwa na lengo la kusikiliza na kutatua kero za wafanyabiashara pamoja na kuhamasisha utulivu na maendeleo katika eneo hilo.
katika Ziara hiyo amefanya kikao katika viwanja vya soko hilo, ambapo Dkt. Shemwelekwa amewasisitiza wafanyabiashara kuendeleza shughuli zao kwa amani na utulivu ili wajipatie kipato halali na kuimarisha uchumi wao na Taifa
.
Amesema kuwa serikali imehakikisha mazingira ya nchi yako salama chini ya uongozi wa Amiri jeshi Mkuu Rais Dkt. Samia Suluhu Hassan, hivyo hakuna sababu ya wafanyabiashara kuwa na hofu.
Aidha, ametoa wito kwa wananchi kutooa taarifa wageni au watu wanaotiliwa mashaka, akibainisha kuwa kuna watu wasiopenda kuona Tanzania ikiendelea kufurahia amani. Amewasisitiza vijana na wananchi kwa ujumla kulinda amani ambayo ni msingi wa maendeleo ya taifa.
Katika hatua nyingine, Dkt. Shemwelekwa amezungumzia mikopo ya asilimia 10 inayotolewa na Halmashauri kwa makundi ya wanawake, vijana na watu wenye ulemavu. Amesema fedha zipo, hivyo wafanyabiashara wanapaswa kuunda vikundi vya kuanzia watu watano ili waweze kukopeshwa. Pia amewahakikishia kuwapa Afisa Maendeleo na Afisa Biashara watakaowasaidia katika usajili wa vikundi hivyo ambayo watakuwa katika Soko hilo na kutoa huduma ya kuunda vikundi vya wafanyabiashara hao .
"Mikopo hii haina riba. Jiungeni kwenye vikundi ili mnufaike na fursa hizi za maendeleo," amesema Dkt. Shemwelekwa.
Kwa upande wao, wafanyabiashara wa Soko la Mnarani Loliondo wamemshukuru Mkurugenzi kwa kuwatembelea na kusikiliza changamoto zao. Wameishukuru serikali kwa ujenzi wa soko jipya la kisasa ambalo linaendelea kujengwa, wakisema kuwa ni hatua muhimu katika kuboresha mazingira ya biashara.
"Mkurugenzi tunakushukuru sana kwa kuja kutatua changamoto zetu. Sisi tuko pamoja na tunaendelea kukushukuru," walisema baadhi ya wafanyabiashara kwa niaba ya wenzao.
Ziara hiyo imetajwa kuwa chachu ya kuimarisha uhusiano kati ya Halmashauri na wafanyabiashara, pamoja na kuongeza hamasa ya kushiriki kikamilifu katika shughuli za maendeleo ndani ya Manispaa ya Kibaha.
